"خطبات مدراس" ایک تعارف

 

خطبات مدراس سید سلیمان ندوی مرحوم کے سیرت النبی ﷺ پر دیے گئے آٹھ خطبات کا مجموعہ ہے ۔ کتاب کا موضوع نبی اکرم ﷺ کے آخری نبی ہونے کے دلائل ہے ۔ کتاب کا حجم صرف 150 صفحے ہیں ۔ لیکن اپنے موضوع اور سیرت النبی ﷺ کے تعارف پر بے مثال کتاب ہے ۔ کتاب کا دوسرا خطبہ گویا کل کتاب کا خلاصہ ہے ۔ اس میں سید صاحب نے لکھا کہ آخری نبی وہی وہ سکتا ہے جو دائمی نمونہ بن سکے اور دائمی نمونہ بننے کی چار شرائط ہیں:

تاریخیت: یعنی اس کے حالات مستند ذرائع سے حاصل ہوں ۔

کاملیت: یعنی اس کے تمام حالات ہمارے سامنے ہوں کچھ راز نہ ہو۔

جامعیت: یعنی اس کی سیرت ہر طبقہ کی راہنمائی کر سکے ۔

عملیت: یعنی وہ جس کی تعلیم دے اس پر خود بھی عمل کرکے دکھائے ۔

اس کے بعد ایک ایک خطبہ میں ایک ایک موضوع کو لے کر اس کی تفصیلات کو پیش کیاہے ۔ اور اس کو دلائل سے مکمل واضح کیا ہے ۔

کتاب کی ایک خصوصیت یہ ہے کہ انہیں چار باتوں کو دوسری بزرگ ہستیوں کے تقابل کے ساتھ پیش کیا ہے ۔ جس سے دلیل خوب مضبوط ہوجاتی ہے ۔

اپنے خطبات میں سید صاحب مرحوم نے یہ دعوی بھی کیا ہےکہ تدوین حدیث کی تاریخ کی وضاحت میں انہیں اولیت حاصل ہے ۔ یعنی انہوں نے ہی سب سے پہلے یہ اس اعتراض کا جواب دیا ہے کہ حدیث امام مالک کے زمانہ سے پہلے نہیں لکھی گئی ۔

آخر کے دو خطبات پیغام محمد ﷺ کے لیے خاص ہیں کہ آخری نبی کا پیغام کیا ہے ۔

کتاب "خطبات مدراس" سیرت النبی ﷺ کے اردو ذخیرہ کتب میں ایک ممتاز حیثیت کی حامل ہے اور بلا شبہ "بہ قامت کہتر بہ قیمت بہتر" کی مصداق ہے ۔ تمام اہل علم نے ان خطبات کوبہت سراہا ہے ۔ سیرت النبی ﷺ کے طالب علم کو اس کا ضرور مطالعہ کرنا چاہیے ۔

کتاب بہت سے مکتبات سے چھپی ہے ۔ قیمت آج بھی سستی ہے۔

ڈاؤنلوڈ لنک